大學應唔應該去上莊?

撰文:daddy最後更新日期:2020-10-28


黎到11月,又係各大院校招莊、傾莊嘅日子。成日話大學五件事,究竟自己應唔應該上莊?下面嘅經驗可以幫到你!即刻睇睇上莊前一定要知嘅五件事啦!

莊員

一支莊咩都假,最重要嘅一定係莊員。入左大學已經有兩個幾月,如果你想上嘅係大莊,可能已經舉辦過幾次試莊活動。如果你覺得自己同大部份嘅"未來莊員"的價值觀經常大相逕庭,就一定要小心考慮係咪正式上呢支莊。係一年嘅莊期入面,舉辦嘅大小活動可能多過二十個,執行方法有分歧不緊要,但價值觀沖突很難磨合(例如運動比賽,有人認為體育精神及公平性重要,有人認為勝負比較重要)。

如果你覺得自己同大部份嘅"未來莊員"的價值觀經常大相逕庭,就一定要小心考慮係咪正式上呢支莊。

上莊期間,見莊員的時間可能比見家人的時間還要多,一齊因為莊務走堂、比人con、食頹飯。佢地見過曬你最樣衰、最頹同最真嘅一面,捱過一年莊期,呢班人好大機會係一世嘅朋友黎!

有一種關係叫莊員@Mokie Mok
 

頂唔頂得順con會同老鬼?

每個soc/hall嘅莊都肯定有老屎忽,佢地一定會用以前嘅睇法同經驗黎質疑你。上莊果陣,你可能都有想改變嘅事或者文化。但老鬼好多時唔想你去改變,唔跟從佢地嘅做法就會當你錯,覺得你嘅方案唔可行,插到你一棟都無。有一些老鬼更加係為con而con,「點解唔笑住答問題」、「笑笑口點解咁唔認真?」。不過有一班好莊員傳紙仔幫你打氣,好快就捱得過。

雖然老鬼可能好無聊,或者雞蛋裡面挑骨頭,但無可否認佢地都係愛呢個地方,先會放工攰到隻狗咁都番黎con會陪你通頂。佢地都經歷過做莊員嘅日子,有時諗多諗,可能佢地講嘅野都有參考價值架!

老鬼都係愛呢個地方先會放工攰到隻狗咁都番黎con會陪你通頂,有時諗多諗,可能佢地講嘅野都有參考價值!

能力適唔適合?

可能你會覺得上莊最緊要咪又係醒目同做到野,但除左呢d,仲要求好多其他隱藏能力。例如經濟能力,上莊係一樣燒錢嘅事,好多時搞活動買物資都要自己出住錢先,仲要無時間做part time,屋企support唔到開支就麻煩啦。仲有交際能力(虛偽嘅能力),好多時出席社交場合(Inaug),點樣去"so guest",點樣去同人講野而避免是非同敏感話題等等。

 

香港大學五件事: 上莊, 唔係化妝咁簡單 @Lai UP / 說英文的香港人

傳統文化的壓力

如果你上嘅莊係有點歷史,好大機會都會有所謂嘅"傳統"、傳統文化、傳統活動等等。例如上莊前一定要做某些奇怪事情(比JJ鞭打)、dem一個好奇怪嘅cheers或者beat、運動比賽幾多屆冠軍等等。這些十幾年或者幾十年嘅文化,你可能唔鐘意,但又唔可以唔做。如果你想改變,老鬼就會出現不停插你。或者已經拿了十年冠軍的運動比賽,到今年終於輸了。如果抗壓力不夠,這些龐大的壓力,可能會令你莊期那一年都生活得很痛苦。

自己的目標是什麼?

上莊的確可以令你的大學生活有返色彩,同一班莊員一齊搞好多活動,著住套suit周圍走。但如果只係純粹想得到生活體驗嘅人,我勤你唔好上莊,因為有機會害死一班莊員。如果純粹想過下癮嘅,到ocamp果陣做組爸媽同oc仲好!同埋,唔好諗住上莊對搵工有幫助,公司只會覺得你花左d時間唔知係邊度。

不過,上過莊嘅都知道,上莊時果種熱血、想做好一件事果種衝勁,可能之後一世人都唔搵唔番。同埋,上莊的確可以認識到其他唔同major嘅人,擴闊自己嘅人脈。正所謂出外靠朋友,筆者出到黎做野,都會成日問以前上莊認識嘅人意見。例如design就搵番VA嘅朋友問,整website就問competer science嘅朋友,整片就問番media嘅朋友。

好多人覺得上莊好傻,無實質得益又做到狗咁,但其實賺到既野其他人唔會知!

最重要係賺左班莊員

每一支莊甚至每一代都有獨特嘅style,有d比較正經,有d係邊做野邊玩,有d就hea住做。無論你地完成幾多件豐高偉蹟都好,諗番轉頭,如果無莊員去同你分擔喜悅或者傷心嘅話,個種感覺係好孤獨。希望想上莊嘅各位關心下"未來莊員",吹下水或者飲下野,一年之後,你會發覺最重要嘅係你賺左呢班莊員。

撰文:daddy最後更新日期:2020-10-28